Bu gün hər bir azərbaycanlı bəşər tarixində ən qanlı cinayətlərdən biri olan Xocalı soyqırımının günahsız qurbanlarının əziz xatirəsini ehtiramla yad edir, onların ruhuna dualar oxuyur. Faciənin 32-ci ildönümü əvvəlki illərdən fərqlənir, ona görə ki, Xocalı şəhəri 2023-cü il sentyabrın 19-20-də rəşadətli Milli Ordumuzun apardığı lokal antiterror əməliyyatları nəticəsində erməni vandallarının tapdağından həmişəlik azad edildi, ədalət zəfər çaldı. Sentyabr ayının 24-də isə Xocalı şəhəri Azərbaycan Respublikasının tam nəzarətinə keçdi. Azərbaycan Respublikasının Prezidenti, Müzəffər Ali Baş Komandan, cənab İlham Əliyev oktyabr ayının 15-də Xocalı şəhərində əzəmətli, üçrəngli Dövlət Bayrağımızı ucaltdı. İndi soyqırım qurbanlarının narahat ruhu şaddır. Fevralın 26-da səhər saatlarından Lənkəran şəhərindəki Azərbaycanlıların Soyqırımı Qurbanlarının Xatirə parkının qarşısında böyük izdiham yaşanırdı. Rayonun idarə, müəssisə, təşkilat rəhbərlərinin və kollektivlərinin, o cümlədən ictimaiyyət nümayəndələrinin və tələbələrin qatıldığı Xocalı şəhidlərinin anım mərasimində “Ana” heykəli ziyarət edildi, önünə gül dəstələri düzüldü.

Həmin gün AMEA-nın Lənkəran Regional Elmi Mərkəzinin kollektivi də Xatirə parkına gələrək heykəlin önünə təzə-tər qərənfillər düzdü, Vətənimizin bütövlüyü uğrunda canlarını qurban vermiş bütün şəhidlərimizə, o cümlədən Xocalı qurbanlarına Allahdan rəhmət dilədi, qazilərimizin tezliklə şəfa tapmasını və sağalmasını arzuladı.